Historia e 99 Lule filloi në vitin 2010, nga vizioni, guximi dhe përkushtimi i Havushe Bunjakut për t’i sjellë më pranë njerëzve vlerat e bimëve mjekësore dhe aromatike të vendit tonë.

Havushe Bunjaku ishte gruaja e parë në Kosovë që regjistroi një biznes bujqësor, duke hapur rrugë jo vetëm për zhvillimin e 99 Lule, por edhe për shumë gra të tjera që dëshironin të ndërtonin të ardhmen e tyre përmes punës, tokës dhe prodhimit vendor.

Ajo që nisi si një ide e ndërtuar me shumë punë dhe dashuri për natyrën, u zhvillua gradualisht në një ndërmarrje me më shumë se 70 produkte natyrale. 99 Lule është sot biznesi i parë dhe i vetëm në Kosovë që prodhon nutricosmetics, duke krijuar produkte nga bimët e tokave tona, në vendin tonë, për njerëzit në Kosovë dhe në mbarë botën.

99 Lule u regjistrua zyrtarisht në vitin 2012 dhe u licencua nga Ministria e Bujqësisë në vitin 2013. Që nga viti 2017, kompania operon sipas standardit të certifikimit organik me ekuivalencë të Bashkimit Evropian. Certifikata aktuale është lëshuar nga bio.inspecta AG dhe konfirmon se 99 Lule është operator i certifikuar për prodhim, përgatitje dhe ruajtje të bimëve, produkteve bujqësore të përpunuara, uthullës, vajrave esenciale dhe kategorive të tjera organike, në përputhje me Rregulloren e BE-së 2018/848.

Sot, puna jonë përfshin bashkëpunimin me më shumë se 75 gra mbledhëse dhe prodhuese, duke kontribuar jo vetëm në krijimin e produkteve natyrale dhe organike, por edhe në fuqizimin ekonomik të grave dhe zhvillimin e komuniteteve lokale.

Çdo produkt i 99 Lule mbart të njëjtin mision me të cilin filloi kjo histori: të marrim më të mirën nga tokat tona, ta përpunojmë me kujdes në vendin tonë dhe t’ua sjellim njerëzve kudo në botë si një dhuratë nga natyra për një jetë më të shëndetshme.